Атырауда инклюзивті «Талшын» театры «Махаббат әлемді құтқарады» атты жаңа концерттік бағдарламасын көпшілік назарына ұсынды.
2023 жылы құрылған театр бүгінге дейін 250-ге жуық ерекше жандарды сахнаға шығарып, олардың өнерін көрсетуге мүмкіндік беріп келеді. Ұжымның басты мақсаты – мүмкіндіктің шектеусіз екенін дәлелдеу.
Бұл жолғы концертте Құрманғазы ауданынан келген өнерпаздың және егіздердің ерекше қойылымы көрерменді тәнті етті. Сонымен қатар Құлсарыдан келген қолөнер шеберлерінің бұйымдары көрмеге қойылып, сатылымға шығарылды.
– «Бағдарлама атауының махаббатпен байланысты болуы тегін емес. Қиын кезеңде бізді алға жетелеген – ата-анаға, балаға деген махаббат», – деді театрдың белсенді қатысушысы Есболат Балбаев.
Бүгінде «Талшын» театры шығармашылық алаң ғана емес, сондай-ақ даму орталығына айналып отыр. Қала тұрғындары үшін төрт тегін үйірме (арт-терапия, хореография, вокал, театр) жұмыс істесе, Құлсарыда вокал, би және қолөнер үйірмелері ашылған.